甘露甜品是一間傳統的中式甜品店，迄立土瓜灣四十年，店子的一碗麥米粥，坊間難尋。「是什麼家傳食譜？有沒有什麼秘密？」老闆蘭姐扯大嗓門的道：「有什麼秘密？麥米粥你阿媽都識煲，食譜你上網很容易找到，咪用花生，麥米，糯米加陳皮煲兩、三個鐘，有幾難。」答案教人出乎意料。
金句一：賣一碗幾十蚊糖水要我講大話？
「糖水做得好，最緊要用料靚，這裏的花生是『大提花生』，大大粒，外軟內結實。陳皮指定是七年新會陳皮，先至夠甘香。」七年啫，坊間一些糖水舖標榜幾十年。「你聽佢講吖，邊有咁多幾十年陳皮呀，我年年去新會買（陳皮）都不多見；另外，幾十年陳皮要賣幾多錢呢？賣一碗幾十蚊糖水要我講大話？我唔會，七年就七年。」
金句二：要你24小時坐喺度唔使做一樣辛苦
之後，是火候。「麥米好硬，鎚仔揼唔難，要煮到開花，火力一定要夠猛，廿幾年前我自己要專登鋪煤氣喉過來（店子），花咗成廿萬。待麥米開花後，才先後加入糯米、花生和陳皮，太早落糯米和花生會糊，沒有咬口。」至於具體是什麼時候放入材料？「答你唔到喎，我煲（每一款）糖水，從不睇鐘，每一煲糖水的材料大小都不一，質量也次次不同，怎會次次都一樣？我是憑經驗和感覺去決定時間，整個過程動輒花上兩、三小時才煲好，工多自然藝熟啦。」所以，每天一大清早，蘭姐和兒子便會準備材料和烹調，營業至凌晨一時。會不會很辛苦？「唔辛苦怎得世間財？但鍾意做就唔辛苦，若不鍾意要你24小時坐喺度唔使做一樣辛苦。」
金句三：唔好食無朋友
蘭姐很自豪自己的食物出品，不管是喳咋、綠豆沙或紅豆沙，每一款甜品她都能說出的心得和用心，好食背後，更啖啖是心機。「我成日講：『唔好食無朋友』，食完幫襯覺得好先至有朋友做！別人吃得開心，才會記得你，才會再幫襯！」開店四十年，深受街坊支持，不少街坊一代人、兩代人，甚至三代人一起來幫襯。「一些搬走了甚至移了民返港也特意回來光顧。」蘭姐笑容滿臉地說。所以，來甘露吃一碗麥米粥，吃得不止是味道，其實也是學做人。
甘露甜品
土瓜灣美景街50號地舖
撰文：郭昊軒
攝影：信哥
