男人貪玩，佢哋認。四個男人走埋一齊，玩得更勁。玩玩吓，玩出一間舖，一個夢。「男人其實好簡單，走埋一齊，咩都講，就係唔會講『唔得』！」
在他們之前，大概沒有人預期土瓜灣可以有一間英式barbershop加紋身店出現。一開門，三個人專注打機，一個人認真剪頭髮。「Sorry介唔介意我一路訪問一路打埋呢鋪機！呢度停唔到！」Kith頭也不回。寓工作於娛樂，很多人都想，但他們話做就做了。兩年多前，Kith、Mike、Marcus和Nigo，因為鍾情英式文化與復古電單車而成為老友。四個人背景不同，Kith和Mike是髮型師，Marcus和Nigo是紋身師，但有一點很相似，「要做就做到盡。」研究電單車改裝也是，要改改到盡；之後覺得，是時候要找個更大的目標。
最多咪從頭嚟過
「其實，當時也是人生一個低潮期。」Marcus說，「有想過大家一齊開間舖，改變一下生活，但真係冇諗過佢哋咁快OK。」由搵舖位到The 59 Tattoo & Barber shop正式開門，前後不到三個月。「當時真的沒想過要做出什麼成績，只是想有個自己地方可以hea又開到工，當然也沒想到搵幾多錢。」總之，事在必行。「當時裝修費預40萬，其實40萬我們都拿不出來，只是拍心口：『總之實搞得掂！』到後來開始裝修，發覺地又爛，電線又要整，結果埋單80多萬！」他冷笑一聲⋯⋯
如果只是一個人，大概會茫然，走不下去。但四個人又總會出現一點化學作用，「志在走得多遠就多遠，最多咪從頭嚟過！」但這不是晦氣話。Marcus說：「我們最正的地方是，圍在一起從來不會有負能量。剛開舖為了盡快能夠清債，個個日做夜做，但不會有人呻辛苦，最多問一句：『今日又做咗幾多個客呀！』男人之間就是不會諗無謂嘢，做咗先講啦。」
認真地玩，然後一起成長
外人看他們太簡單，甚至魯莽，走在一起時玩多過做，他們也不否認。但一年半載過後，客人愈來愈多，小店還請了員工，才發覺他們玩得來不乏認真。Nigo說：「一開始我們已很清楚，四個人個性不同，每個人都有自己要追的目標，雖然在同一個地方工作，但每個人都是回來做自己。不過有一點我們都相信，只要每人做好少少，各自做好自己本份，間舖就一定會愈來愈好，所以每一日，肯定都在進步成長。」終於明白他們為何總是輕鬆，因為他們知道，只要做好自己，萬大事還有三個人頂住，何不relax？
他們承認，不是朋友，就不會有這裡，店中每個角落都是四個人一齊出過力，就連每件擺設，都是大家逐少逐少添置。
其餘婆婆媽媽的，已毋須時刻掛在口邊。Kith說：「男人真的好簡單，有時見到我忙，幫手買個飯，或者壞車時幫我扭粒縲絲，我已經覺得好開心。」他攤開手臂上的紋身，「一邊留給Nigo，一邊給Marcus，等他們紋完，我才會讓其他紋身師紋別的地方。」
其實，何時遊戲何時認真，他們從來分得很清。
至於他們的下個目標：一起旅行。
The 59 Tattoo & Barber shop
土瓜灣明倫街1號
IG：shop@the59tattoo
