李拾壹的想像練習
創作人的腦袋總是裝著古靈精怪的想法，或出現異於常人的行為，李拾壹作為一位創作歌手，他比起其他歌手更古怪、更跳出常規。從他不停在FB上「搞好GAG」，和有一位幻想出來的朋友，可見一斑。 這位朋友叫John， 一身藍色火柴身軀，活躍於李拾壹的社交媒體，他受喜愛的程度是連拾壹的朋友會跟他合照，甚至大品牌PR也會送禮物給John。
John搭嘴：其實啲PR 都係借李拾壹地址送禮物畀我。
（李拾壹面露不悅）
記者今天約了拾壹與John在Studio內，談談關於創作與想像，除了Cast Away 的Wilson外，為甚麼John會憑空降世？
拾壹：John幾時會出現呢？就係當李拾壹一個人嘅時候就出現。如果我同女朋友出街，佢就唔會出現㗎嘞！
John：我覺得李拾壹好煩囉，淨係帶我去茶餐廳，帶女朋友去高級日本餐廳又唔帶埋我。
記：點形容John呢？
拾壹：開心、賤格，但又好似普通人一個。佢可能出現一秒，下一秒又消失。
John：我其實就唔想同LOSER一齊，佢又成日偷影我，又寸我，太多原因，或者外面有靚女，所以我出現一秒就走。
在John以前，李拾壹這奇怪的小子，已擁有多個虛構朋友（Imaginary Friends），包括小棍女、 司琴低娃、防潮峰、 核突與核特等等，一路伴隨著李拾壹。
記：呢啲朋友帶畀你乜嘢？
拾壹：開心囉！好玩！起碼啲人見到會笑，真係有朋友話一見到阿John 就開心返。
記：佢哋點影響到你創作？
拾壹：我嘅第一隻碟，曲詞編監都係我自己，所以我就虛構咗我嘅和音就係房朝峰，化妝係FCF MAKE UP。有一啲音樂，會以司琴低娃個名嚟出，因為有一啲好想玩嘅音樂，唔係個個聽得明，就會用司琴低娃個名。
拾壹：我睇創作，唔係剩係一首歌，而係你點睇件事，都係創作。
你看李拾壹，他與別不同，有點奇怪但創作力驚人，唱作演亦可，更屢獲獎項。他不從俗，不唱流行大路情歌，他只做自己一套。在這創意工業，真正創意很少，流行曲面目模糊，網絡二創抄襲，比比皆是。
拾壹：一個冇想像力嘅世界，就係而家。甚麼改圖、二創、向乜乜致敬，點解會有呢啲嘢出現呀？因為當年有人創造出嚟吖嘛。以前改詞都冇任何嘢可以改，係今日先有得改。人哋諗過嘅嘢我唔想再做，例如曾經諗過一首歌嘅Melody好正，要一口氣唱完，但係我發現同許哲珮嘅《氣球》太似，我就唔要嗰首歌。我會盡量擴闊自己Library，活得再「自己」一啲，用多啲時間去諗一啲大家冇諗過嘅嘢。
（John在旁點頭，表示同意）
拾壹：例如John 有日喺茶餐廳度叫人嗌佢「靚姐」，然後我自己就叫佢正常啲。其實我就係扮緊普通人，覺得John唔正常，其實John就係我自己。
拾壹：我覺得我會愈來愈做到阿John。
John（望著拾壹）：唔好掉低我。
拾壹：OK
記：如果大家都想進行想像練習，可以點做？
拾壹：睇多啲睇多啲睇多啲，有多啲材料喺手先可以想像。擴闊對Normal （正常）嘅定義，各方面都可以OPEN啲。多啲睇生活入面嘅Alternatives，另一個角度去睇同一件事。
John：各位PR 姐姐搵我，可以附上美女相一張，或者FB/IG LINK 都得。
唔該晒#johntheimaginaryfriend
