講起付出，一時鋒煙四起，男女各執一詞。有人覺得付出是理所當然，有人認為付出也要講條件；今次找來
Facebook page「十萬個激嬲女友的理由」的男女版主，兩名90後，本身也是一對情侶，來一場關於「付出」的舌
戰。
1 一段關係入面，男 / 女點睇付出？
女版主：一段關係入面付出係必然同必需嘅，有愛就自然會付出，冇愛就「必」都「必」唔到出嚟。例如你愛佢就
自然會付出時間心思去整卡送俾佢咁。
男版主：你覺得對象值得嘅話，就會願意付出一啲平時對其他人唔會花嘅時間心思去令佢開心。
2
你認為男 / 女最不願付出的是？
女版主：男人最唔願意付出心思，有得揀佢哋會俾錢買禮物都唔會落手整禮物，啲男人以為俾錢就代表一切，但我
哋睇嘅可能係背後嘅心機時間。
男版主：我覺得女仔最唔願意付出嘅係金錢，可能因為佢地覺得男人買嘅嘢唔值，幾百蚊買隻game ，所以更加唔
想付出金錢去買俾男友。同埋青春囉，尤其愈接近適婚年齡嗰啲就愈唔願意付出青春。29歲嗰啲你叫佢付出4年拍
拖都好似攞佢命咁啦。
3
能否接受對方付出少過自己？
女版主：唔介意，唔可能會有一樣囉，肯定會有一邊多啲，一邊少啲，只要差距唔好太大。
男版主：或者係分時段囉，可能有一段時期女付出多啲，一段時期男付出多啲；不過都係嗰句，唔好差太遠就OK
。
4
付出是否需要學習？
both：唔需要。
女版主：都話冇得必出嚟嘛。
5
成日話付出不求回報，真？
女版主：唔真，因為完全冇回報一定會介意，真係要好偉大好高尚先做到不求回報。當你付出得太多嘅時候而對方
一丁點都唔付出，咁呢啲係兵嚟啦喎。
男版主：認同。
6
有否試過真心誠意為對方付出，完全不獲欣賞？
女版主：冇喎。
男版主：我都冇試過，呢啲係大家相處之道。就算收到張好核突嘅卡，但都知道對方用咗好多時間整，就點都會開
心。
女版主：係啦，就算實物唔滿意都會滿意背後嘅付出。
男版主：要學識睇到對方背後花嘅心思好重要。
7
那又有否試過對方為你做了些事情，令你真心感動？
女版主：煮早餐，我賴床佢會煮早餐我食。其實大家都好懶，喺屋企佢係少爺仔唔洗煮，但對住我佢都會煮。
男版主：我生日佢會整蛋糕，第一次收到蛋糕係堅感動嘅，平時咁懶嘅人肯落手落腳整個反差係對件事有加乘。
仲有整卡囉，因為佢畫畫好叻嘅，所以佢好似係咁意畫已經靚過我搞好耐嗰啲咁。
女版主：呢句真。
男版主：仲有佢肯付出時間同我睇戲囉。
女版主：係呀係呀！偉大呀！睇咗好多唔想睇嘅戲！
8
結論是，付出 ＝ 愛？
男版主：我覺得付出同愛係因果關係，有愛就有付出。你唔會想像到一個人好愛但係零付出。
女版主：付出係愛的表現。
男版主：加油，我仲等緊個早餐。
女版主：等吓啦。
9
從「十萬個激嬲女友的方法」的post當中，分享一個關於付出的深刻故事。
真人真事：
男友整唔見咗上年聖誕我織俾佢嗰條頸巾，
然後我嬲住咁再織過俾佢。
Profile：
兩個90後，大專認識，拍拖超過5年，累積了不少「激嬲女友」的經驗。成立Facebook page「十萬個激嬲女友的理
由」，俾各位男友們圍爐取暖。
