十個有九個都係咁。唔知點解硬係對外人臭脾氣，對朋友都還可以，但一旦回家對住老豆老母或者男女朋友老公老婆，面口就唔多好，少少嘢就發哂老脾。都知你會內疚，但你次次癲完懺悔都不是辦法，畢竟時日一長真係會傷感情，傷害家人之餘又傷咗自己。要改，首先要知道點解你會咁！有一個原因，可能係你根本討厭自己，在發自己脾氣……
你照緊哈哈鏡？
不對外人發脾氣呢個當然好易理解，斷估我們都唔會覺得自己真係大哂，可以任意對別人呼喝或者要他們承受我們的壞情緒，如果真係亂發脾氣，咁真係有病啦。但你明明知道自己個人其實唔係真係咁易嬲，或者唔係咁臭檔，何解一對住屋企人就忍唔到？話說有個東西叫「哈哈鏡」，我們同屋企人相處，根本就好像整天照住塊哈哈鏡，簡單來說就是，親密的人總是會讓我們看見自己的缺陷，望住佢地就如望住塊哈哈鏡，會照出自己心裡的妖精來，令你望到自己樣衰、缺點多多，愈望愈自我價值極低。屋企人就係你塊照妖鏡！
情形就是，如果伴侶同朋友出去happy玩番晚，但三更半夜先返又唔同你講聲，你嬲的其實未必係情人的大意，而是你自己的自信心欠奉或者安全感欠奉；望住仔女見到佢地蹦蹦跳跳無時停話極唔聽，又無禮貌，你終於忍唔住大發脾氣，說實在你嬲的可能係自己點解咁無用唔識教佢哋。一句講哂，親近的人真係會反映到你自己係咩人，所以你更加對自己生氣了。那些你看見的缺點，可能是真的，但亦可能是你放大了。
接受自己，原諒自己
改變不難，首先你要記住人無完美，發咗脾氣可以講對唔住。下次亦記住自己其實唔係想像中咁差，你的價值並不如你想像般低。更要知道，情人或屋企人的行為並不直接等如你的為人，情人沒好好尊重你，絕對唔等如你不好，你不值得被尊重，可能那只是他一次的無心之失。嬲過了，傾過了，放下了，再記住自己其實好好。
如果真係發現自己對親密的人態度差，不妨想一想，佢地對你的重要性。幻想一下如果無咗佢地會點？你和他們的親密和相依，值得你一次又一次浪費時間去發脾氣？有一個方法，你可以多點和親密的人連同外人一起相處，可能是邀請朋友們到你和情人的屋企相聚，在外人面前，你會表現得更好，你不會輕易情緒差，而更大的好處是你可以看見情人另外的一面，看見他和其他人互動和交流，你又重新發現他的可愛之處，拉遠一點看情人，再度欣賞，同時也是給予自己空間去欣賞自己的選擇和珍惜呢份關係。
真係發現自己情緒持續壞，脾氣有差無好，更加要稍為遠離一下身邊人，俾番一個可以喘息的空間自己。因為和之前說的一樣，對住他們就是不停在照鏡，唔能夠拉番自己出來欣賞自己，就要稍為遠離呢面鏡子。靜一靜，對自己，對他人，都是好。
撰文：恆
圖片來源：Unsplash
