亞運開鑼，大家的眼睛又再聚焦在一班星級運動員身上，但大家又有沒有想過當眼前的運動員不再游泳、不再打球，他們去了哪裡？在香港當運動員不容易，當一個退役運動員更難。運動員將自己青春年華獻給了運動，一心一意向著目標出發，用汗水與韌力交出成績。但踏出運動場後，面對著比運動場更複雜的社會，退役運動員的路又怎麼走？
作為退役劍擊運動員的劉晴而，對於退役路上的高高低低應該比任何人來得更有感受。
晴而掛了劍差不多十年，相比起好多退役後立即當上教練的人，晴而卻選擇了一條來得迂迴曲折但深刻的路。「好多退役嘅人會選擇教劍，不過當年我想搵下自己嘅可能性，走咗去讀酒店。」晴而說。讀酒店，可能對好多人來說可能只是一個大學的課程。但對於一個將自己人生黃金時間奉獻給運動的人來說，選擇酒店行業，而不選擇運動相關的學科，意味著一切需要重新開始。
晴而將自己人生重新洗牌，一切由零開始。到不同的酒店、會所實習，期間又考了許多酒店證書。晴而說：「嗰陣我讀完酒店，之後做過酒店OFFICE、教過書，又走咗去考好多證書咁，都覺得自己多咗可能性。不過做咗一段時間之後，每日朝九晚五，覺得自己好似無咗心跳，冇咗當初做運動員嘅熱誠。」大概上天當時聽到她的內心的聲音，竟然讓她遇上人生另一個挑戰，就是踩單車上西藏！
「話說當時我喺健身室做運動，遇到幾個男仔話決定踩單車上西藏為保良局籌款。佢哋問我有無興趣JOIN，可以嘅話就兩日後正式練習。當時我口快快答應咗，其實之後我自己搵咗十萬個理由想推佢哋，不過最後都係出現咗。」一下子的決定，成就了晴而人生最難忘的決定，開始了為期四十日的單車之旅。
晴而坦言決定去西藏的時候，除了要放棄一個月薪金之外，身邊的人亦有曾經阻撓過她。晴而說：「曾經好多人都話我係打劍，唔係踩單車。當時我自己都唔相信自己做到，但我覺得只要搵到一個堅持嘅理由，其他人嘅反對都阻礙唔到我。」就在堅持自己的信念底下，晴而向西藏進發。
問晴而這趟旅程有有趣的事嗎，她思索了一會，就回答：「聽落去踩單車上西藏好好似好好玩，其實就唔係好玩。我會咁講，踩單車就好似同打劍一樣，要成功，冇捷徑可以到達終點。嗰四十日，我就每一日上一個山，再落山。一步步踩，每日平均踩足十二個鐘。去到後段基本上係一路踩，一路痛。期間真係見到好多人放棄！但最後我終於見到布達拉宮！」晴而說這趟旅程的背後，除了想再挑戰自己之餘，更想身體力行，當一個榜樣給下一代知道：想做到就可以做到
如今晴而再執起劍擊教鞭，用另一個方式延續自己的運動事業，希望用自己的經歷影響下一代的運動員。一向講求play safe的香港，或者有人會問當初為甚麼不直接退役就做教練？要兜一個大圈？
但反過來想，人生往往只是跟隨別人的路，走上同一軌跡的話，哪裡活得精彩呢？像晴而般，其實只要永遠不怕重新開始一件事，人生的可能性永遠比想像中大。
