menu
好習慣

【壞習慣】一句說話激嬲人!你有無講過先?

不同人對不同說話有不同反應,畢竟人人的忌諱不同,我的底線不等如你的底線,你的爆點又不是我的爆點。之不過,有些說話絕對是大多數人一聽就頂唔順,弔詭是,明明你都知道呢啲說話一聽就唔妥,成個人著哂火咁嬲,偏偏你對住人地又係會講咗……以下呢啲說話,真係厲害到一句就激死對方,你有無同感先?又有無講過先?

你又有邊句係一聽即爆的呢?睇吓邊句最爆先。

「我都係為你好咋。」

無論什麼關係,呢句真係勸你少講為妙。首先,你是她/他的誰先?你憑什麼知道什麼叫做為對方好!你認為的好又是別人認為的好麼?別太過自大好不好。說呢句話的人真的是自以為是到一個點!彷彿這個世界你明哂,你就是知道別人的盲點,別人的弱點,叻到識點條好路俾對方。講真,說教這回事,無論你是老公老婆阿媽阿爸或者邊位摯友都好,都是最令人反感的!也不特止,這句說話背後硬係藏著什麼陰謀似的,好似你氹人落嗒做啲乜咁。「我都係為你好咋……有錢梗係買股票啦……」即使老母說一句:「我為你好咋,飲哂碗湯呀!」你都覺得煩啦,對嗎?

「唔好唔開心啦。」
話說呢句真係情侶關係之中最忌的一句。尤其女方有什麼不高興,(通常都係關你事啦阿男方笨蛋),但是男的一方總會輕描淡寫的一句「唔好唔開心啦。」廢話至極!已經唔開心緊,你還叫人唔好唔開心,到底有沒有把人的情緒放在眼內,到底有沒有嘗試了解過他人為何不高興。就算你心裡覺得她不高興只是因為芝麻綠豆的事,都唔係蠢到講呢句呀嘛。更可惡的人會加多幾句:「咪咁小器啦。」或者「好小事咋喎!」你眼中的小事,可是別人眼中的大事。做人別太自我,關心下別人的感受好不好?

「我無所謂呀,你咋!」
好幾次聽到朋友講呢句,真的火都嚟。其實通常在很普通的對話當中出現,舉例說,「今晚想食咩?」「我乜都食,無所謂呀,你咋……你知你㗎啦……」真的一聽即著。你無所謂好巴閉?是不是對方就是好麻煩和斤斤計較的人?背後的潛台詞是不是嫌人煩?還是根本是說這話的人不想動腦筋,扮哂沒所謂,扮哂什麼都OK?

「對唔住囉。」
終極致命。對唔住可以講,但多個囉,火都嚟,呢句話本身沒錯,錯在語!氣!踩地雷的,應該多數是熱戀中的男生。女友為什麼生氣你不知道,即使你知道又想扮唔知,迫於無奈知咗但又唔忿氣,為了想平息,唯有一句「對唔住囉。」再加句「我無心家嘛。」或者「我點諗到你會嬲……」傻仔,你是想撩交嗌定平息呢?對唔住就是對唔住,千萬別加任何助語詞或者語氣。忍一時,你會發現被人原諒和原諒人是多麼快樂,至多隔多兩天才拎番出來討論。當下那刻,「對唔住」三字,收工。

說話說不對,有時真的比行動來得傷人心。小心說話呀各位。

Tags : 壞習慣
堅持是一種習慣,習慣是一種堅持
好集慣